Жаңалықтар
1500 домбырашы күй тартты
Арқалық қаласында өткен «Домбыраның күмбірі – бар қазақтың бірлігі» атты мерекелік іс-шарада бір мезетте 1500 домбырашы күй тартты. Бұл туралы «Egemen Qazaqstan» газетінің
Ұлттық домбыра күніне орай, қаланың орталық стадионында арнайы сахна құрылып, ақ шаңқан киіз үйлер тігілді. Ал қатарынан 7 күй орындап, қала тұрғындарының ыстық ықыласына бөленген мың жарым домбырашының ішінде әр салада еңбек етіп жүрген жұмысшылар, мамандар, студенттер мен мектеп оқушылары бар.
Мың жарым адамдық оркестрдің ең жас мүшесі – 7 жасар Айзере Сахан. Ал ең қарт домбырашы – бүгінде жасы тоқсанға аяқ басқан Арқалықтың құрметті азаматы Кәки Ақан ақсақал. Мерекелік оркестрдің құрамында бір ғана Бөлтіріковтер әулетінен отыз адам өнер көрсеткенін де айта кету керек.
Іс-шара барысында өнерпаздардың киімін, аспабын алып беріп, демеушілік жасаған меценаттарға құрмет көрсетілді.
Ең қызығы, мерекеде өнер көрсеткен 1500 домбырашының 70 пайызы бұған дейін домбыра тартып көрмеген болып шықты. Олар ұлттық аспапты домбыра күніне дайындық барысында үйреніпті.
Арқалық кешін күмбірімен тербеген күй керуені таяуда ғана өткен «Домбыра – думан» аймақтық домбырашылар байқауының гала-концертіне ұласты. Іс-шараның соңында Арқалыққа арнайы шақырылған Қуандық Рахым, Шаһаризат Сейдахмет, Динара Жаңабергенова сынды эстрада әншілері ән шырқады.
Қостанай облысы